У дзяржаўнай установе адукацыі “Заеліцкі навучальна - педагагічны комплекс дзіцячы сад – сярэдняя школа” адбылося чарговае пасяджэнне метадычнага аб’яднання настаўнікаў беларускай мовы і літаратуры па тэме: “Арганізацыя работы з адоранымі дзецьмі на вучэбных занятках і ў пазаўрочны час”.
У практычным блоку настаўнікі прысутнічалі на інтэлектуальнай гульні “Што? Дзе? Калі?” па творчасці Аркадзя Куляшова для вучняў IX – XI класаў, вядучым і кіраўніком якой была Пукач Ірына Віктараўна, настаўнік беларускай мовы і літаратуры.
Мерапрыемства праводзілася з мэтай выклікаць у вучняў інтарэс самастойна весці пошук і вывучаць дадатковы матэрыял пра жыццё і творчасць паэта; фарміраваць уменне працаваць з вучэбнай і навукова - папулярнай літаратурай; развіваць даследчыя ўменні; прыяць выхаванню пачуцця калектывізму. Педагогамі адзначана, што пастаўленыя мэты ў працэсе гульні былі дасягнутыя.
У тэарэтычным блоку педагогі абмеркавалі актуальныя пытанні падрыхтоўкі вучняў да алімпіяды па беларускай мове і літаратуры. З формамі, метадамі і прыёмамі работы па развіцці творчых здольнасцей вучняў на занятках і ў пазаўрочны час пазнаёміла настаўнік сярэдняй школы №1 Куксік Наталля Аляксееўна.
Алгарытм састаўлення вусных выказванняў па пэўнай тэме асвяціла настаўнік Усцярхоўскага НПК Саковіч Наталля Рыгораўна.
Настаўнік Заеліцкага НПК Пукач Ірына Віктараўна правяла майстар - клас па падрыхтоўцы вучняў да водгуку на мастацкі твор.
Настаўнікі адзначылі, што пасяджэнне прайшло насычана і карысна для арганізацыі практычнай дзейнасці па арганізацыі работы з адоранымі дзецьмі на ўроках і ў пазаўрочны час.