Што можа быць больш пяшчотным, чым слова "матуля"?! У дзяцінстве ўсе адчуваюць далікатныя маміны рукі і вусны, пяшчотны голас мамінай калыханкі, пяшчотны і напоўнены бязмернай любоўю погляд мамы. Дзеці растуць, але далікатны дзіцячы тактыльны кантакт яны пранясуць з сабой усё жыццё. І, вядома ж, як толькі малыя пачынаюць ўсведамляць сваё "Я", яны імкнуцца падарыць сваім матулям хвілінкі пяшчоты, якія выяўляюцца ў бясконцых "абдымашках - пацалунках", падаруначках і мілых неспадзеўках.
Вось і надыходзіць Міжнародны жаночы дзень. Кожны год педагогі ЦКРНіР рыхтуюць святочную праграму, якая дазваляе мамам навучэнцаў раскрыць іх таленты і магчымасці.
У гэтым годзе нашым выдатным матулям трэба было выканаць два хатнія заданні. Першае - напісаць "сачыненне" на тэму "Маё хобі". Як шмат цікавага і дзіўнага даведаліся педагогі пра ўнутраны свет, мары і дзіцячыя захапленні мам. З'явіліся цікавыя ідэі для будучых святаў.
Другое хатняе заданне "Любімыя смачнасці дзяцей". Гэтымі шэдэўрамі матулі песцяць сваіх любімых дзетак пастаянна дома і адзін раз у год ладзяць агульнае чаяванне ў ЦКРНіР.
Цэлы тыдзень дзеці рыхтавалі святочныя паштоўкі для сваіх любімых матуль. Яркія паштоўкі, зробленыя дзецьмі з дапамогай педагогаў, - падарунак, які матулі заўсёды прымаюць са слязамі на вачах, таму што іх "асаблівыя" дзеці ў сценах ЦКРНіР з'яўляюцца звычайнымі вучнямі, якія ўмеюць многае, што і звычайныя аднагодкі.
Прагучалі самыя цёплыя словы падзякі ў адрас педагагічнага калектыву. Усе ўдзельнікі мерапрыемства шчыра радаваліся поспехам дзяцей, атрымалі мноства прыемных сюрпрызаў, зарадзіліся вясновым настроем.
Ермаловіч В.А.,
выхавальнік ДУА «ЦКРНіР г.п.Глуска»