Турыстычныя маршруты

Глушчына - край цяністых лясоў, якія займаюць больш за палову тэрыторыі раёна. У гады Вялікай Айчыннай вайны яны сталі родным домам для партызанскіх атрадаў і злучэнняў. Ужо ў 1941 годзе на мяжы Мінскай, Магілёўскай, Гомельскай абласцей паўстала першая партызанская зона.

У яе ўваходзілі і населеныя пункты Глушчыны. Тут змагаліся атрады Герояў Савецкага Саюза Дзмітрыя Цімафеевіча Гуляева, Фёдара Іларыёнавіча Паўлоўскага. Свабоднымі ад захопнікаў былі вёскі Глушчыны Слаўкавічы, Стражы, Амур, Зорка, Чапаева, Малкава, Крукаўшчына, Зелянковічы, Нязнанне, Уюнішчы. Ідучы па прапанаваным маршруце, турысты пазнаёмяцца з гісторыяй партызанскага руху на тэрыторыі Глускага раёна, Палескай і Мінскай абласцей, наведаюць брацкія магілы савецкіх воінаў і партызан у вёсках Клетнае, Слаўкавічы, Заеліца, Катка, памятную стэлу ў гонар падпольных райкамаў КП(б)Б, ЛКСМБ і падпольнай рэдакцыі газеты «Беларуская вёска», якія дыслакаваліся ў ваколіцах вёскі Слаўкавічы.

Мэта экскурсіі - цэнтр партызанскага руху Акцябрска-Любанскай партызанскай зоны - востраў Зыслаў. Тут дыслакаваліся ў гады Вялікай Айчыннай вайны Мінскія падпольныя абкамы КП(б)Б і ЛКСМБ, Любанскі РК КП(б)Б, штабы партызанскіх злучэнняў Мінскай і Палескай абласцей, штаб 25-й партызанскай брыгады імя П.К. Панамарэнкі, рэдакцыі падпольных газет «Звязда», «Чырвоная змена» і «Клiч Радзiмы». У верасні 1942 гады для сувязі з Масквой сіламі партызан і мясцовых жыхароў быў пабудаваны партызанскі аэрадром, які дзейнічаў да 1944 года.

Глуску больш за шэсцьсот гадоў. Яго гісторыя - гэта гісторыя развіцця беларускай вёскі, гісторыя барацьбы, якую вёў беларускі народ супраць іншаземных захопнікаў, адстойваючы сваю незалежнасць.

Маршрут пачынаецца ў г.п.Глуск і праходзіць праз самы старажытны населены пункт раёна - вёску Сіманавічы. Тут знаходзіцца комплекс археалагічных помнікаў: паселішча, абмежаванае на мясцовасці ўмацаваннямі, і старажытны могільнік. Пры дарозе Слуцк - Бабруйск захаваўся будынак паштовай станцыі XIX ст.
Аграгарадок Завалочыцы - некалі радавое гняздо генерал-лейтэнанта Іосіфа Іпалітавіча Жылінскага (1834-1916гг.), які распрацаваў Генеральны план асушэння Палесся. У 1873 годзе быў прызначаны начальнікам экспедыцыі па асушэнні пінскіх балот (работы пад яго кіраўніцтвам па асушэнні Палесся, пачаты ў 1874г. i працягваліся каля 20 гадоў). У доме памешчыкаў Жылінскіх (1914г.) размяшчаецца кантора саўгаса, а будынак спіртзавода (1888г.) не працуе.
Завалочыцы - радзіма Героя Савецкага Саюза Ульяна Аляксандравіча Рыбака.
Наступны пункт маршруту - вёска Дварэц, радзіма ўдзельніка вайны, двойчы Героя Савецкага Саюза, кавалера двух ордэнаў Леніна, двух ордэнаў Чырвонага Сцяга Сцяпана Фёдаравіча Шутава.
Вёска Гарадок (раней Стары Глуск або Глуск Пагарэлы) сёння здзіўляе выдатнымі краявідамі. А ў 1814 годзе ў гонар перамогі над войскамі Напалеона тут была пабудавана Свята-Косма-Дзям'янаўская царква - помнік драўлянага дойлідства рэспубліканскага значэння. Царква дзейнічае і ў наш час.